Пракуратура масава выклікае жыхароў Гомельшчыны

У Гомельскай вобласці ў пракуратуру сталі масава выклікаць людзей, якіх раней судзілі па палітычных адміністрацыйных або крымінальных артыкулах, піша "Флагшток". Таксама пракуратура дасылае позвы тым, хто атрымаў шмат штрафаў па лініі ДАІ.

Паведамляецца, што ў пракуратуры людзей прымушаюць падпісваць папярэджанні пра недапушчальнасць парушэння Крымінальнага і Адміністрацыйнага кодэксаў. Таксама яны пад прымусам падпісваюць абавязанні не парушаць грамадскі парадак.

Можна меркаваць, што ўсе гэтыя меры звязаныя з выбарчай кампаніяй. Улады пасля 2020 года асцерагаюцца грамадскага руху.

Такіх выклікаў, як адзначае "Флагшток", можа быць па некалькі дзясяткаў кожны дзень. У пракуратуру людзей выклікаюць як праз позвы, так і простым тэлефанаваннем.