Пылавыя буры з РФ на стан паветра ў Беларусі істотна не паўплывалі — Белгідрамет
Пылавая бура / kp.ru
На стан паветра ў Беларусі пылавыя буры ў Расіі істотна не паўплывалі. Пра гэта піша БЕЛТА са спасылкай на Бегідрамет.
"Перавышэнняў па вызначаных гігіенічных нарматывах па цвёрдых часціцах у Беларусі 1 кастрычніка не зафіксавана. На стан атмасфернага паветра пылавыя буры істотнага ўплыву не аказалі", — кажуць сіноптыкі.
У паўднёвых рэгіёнах Расіі пылавыя буры разыграліся ў нядзелю, 29 верасня. У паветра паднялася вялізная колькасць дробных часціц глебы, моцны вецер пераносіць іх на вялікія адлегласці. Прычынай стала супрацьстаянне цыклону і антыцыклону ў зоне шырынёй каля 900 км — ад поўдня Чарназем'я да перадгор'яў Каўказа. Парывы ветру дасягалі 16-21 м/с, а ў шэрагу раёнаў фіксавалася 23-28 м/с.
Дробныя і незаўважныя няўзброеным вокам часціцы скіроўваліся ў тым ліку ў бок Беларусі.
