Ці адпавядаюць беларускія заробкі цэнам на прадукты і вопратку?

Існуе пералік прадуктаў (неабходны мінімум), які павінен спажываць у дзень жыхар Беларусі. У гэты пералік уваходзяць:

Хлеб, батон, мука, макароны, рыс, аўсянка, грэчка, прасяная каша, пярлоўка, гарох, бульба, капуста, гародніна, кансервы з гародніны, алей, масла, малако, смятана, сыр, тварог, яйкі, каўбаса, ялавічына, свініна, птушка, рыба свежая, селядцы, садавіна, сокі, цукар, сухафрукты, гарбата, соль.

Паводле падлікаў Еўрарадыё, толькі на ежу, без неабходнай вопраткі, камунальных выплат і г. д. сям’я з трох чалавек, каб не памерці з голаду, павінна выдадкоўваць каля 660 тысяч рублёў у месяц. Для параўнання: сярэдні заробак на сённяшні дзень у нашай краіне складае 1 мільён 130 рублёў.

Ці адпавядаюць беларускія заробкі цэнам на прадукты і вопратку? З такім пытаннем Еўрарадыё звярнулася да эканаміста Сяргея Чалага.

“Наадварот: хутчэй, цэны адпавядаюць заробкам. Прычым адпавядаюць па поўнай праграме”, — кажа эксперт:

“Паколькі ў нас структура эканомікі высокаманапалізаваная, неканкурэнтная, то цэны ў такой эканоміцы ўсталёўваюцца ў адпаведнасці з працаздольным попытам насельніцтва. Груба кажучы, цэны будуць усталяваныя такім чынам, каб так ці інакш забраць усе грошы.

І тут атрымліваецца проста. Кожнае павелічэнне прыбыткаў насельніцтва імгненна адбіваецца на агульным узроўні цэнаў, і ў першую чаргу на тых таварах, якія складаюць асноўную долю штодзённага спажывання: паслугі ЖКГ, прадукты харчавання...”

Згодна са словамі эканаміста, пакутуюць ад павелічэння прыбыткаў звычайна самыя бедныя беларусы, бо падвышэнне заробкаў цягне за сабой і падвышэнне цэнаў:

“Заробкі падвышаюцца такім чынам, што большую частку гэтых павышэнняў атрымоўваюць больш высокааплатныя катэгорыі насельніцтва. А кошты растуць франтальна, яны не могуць быць рознымі для багатых і бедных.

Канчатковым вынікам гэтай палітыкі становіцца тое, што пакутуюць якраз самыя нізкааплатныя катэгорыі насельніцтва, якім нібыта збіраліся дапамагчы, таму што рост цэнаў апярэджвае ўрэшце хуткасць росту іх прыбыткаў, і прычым на тыя тавары, якія складаюць найбольшую долю ў іх выдатках”.

Еўрарадыё звярнулася да людзей на вуліцах Мінску з пытаннем: "На якія прадукты харчавання вам не хапае грошай?". Вось якія адказы мы пачулі:

— У-у-у-у, нам грошай не хапае!
— Так, нам не хапае.
— Камандзіровачныя 15 тысяч — гэта не жыццё. Пастаянна не хапае.
— На прадукты харчавання дакладна хапае. Хіба што на экзатычныя рыбныя стравы не хапае.
— Нават не ведаю. Магчыма, на садавіну. Хацелася б яе есці кожны дзень… Але каб кожны дзень дома была садавіна — не атрымоўваецца.