Ля пікетаў за Лукашэнку абмяркоўваюць яго апанентаў: Ганчарова і Сітнікава

Збор подпісаў за вылучэнне кандыдатаў у прэзідэнты ўжо амаль скончыўся. Але нярэдкасць, што мінчукі дагэтуль не могуць назваць імёны прэтэндэнтаў. Прынамсі, апрача аднаго. Еўрарадыё распытала прыхільнікаў Аляксандра Лукашэнкі каля пікетаў у яго падтрымку, каго з іншых кандыдатаў яны ведаюць.

Жанчына: Ну вось на купалаўскай тры кандыдаты: Ганчароў там, Іваноў…
Хлопец: Сітнікаў...
Іншая жанчына: Аўсяннікаў!
Еўрарадыё: Дык няма ж такіх прозвішчаў. Хоць адно зможаце назваць?
Хлопец: А мне фіялетава! Я ведаю аднаго — Лукашэнку, навошта мне іншыя

Прыхільнікі Аляксандра Лукашэнкі малююць змрочную будучыню, калі раптам прэзідэнт сыдзе.

Жанчына: Калі ён сыдзе, мы прапалі! Будзе такі хаос, што вы нават не ўяўляеце!
Еўрарадыё: Вы вывучалі праграмы іншых прэтэндэнтаў?
Жанчына: Вывучалі! Гэта ўсё трэпалогія!
Іншая жанчына: Вось я задавала пытанне аднаму чалавеку, які ў нас працуе, за каго ён будзе галасаваць. Ён сказаў: "У мяне няма выбару, толькі за Лукашэнку. Я быў у іншых дзяржавах і бачыў, што творыцца, як прыцясняюць, забіваюць".

У той жа час прыхільнікі апанентаў Лукашэнкі не вераць ў перамены пасля выбараў.

Еўрарадыё запытала хлопца, які мае намер падпісацца за ўсіх кандыдатаў апроч Лукашэнкі, ці верыць ён у змены.

Хлопец: Натуральна, не. Я не разлічваю на сумленную перамогу аднаго з кандыдатаў.

Шмат хто з больш сталых людзей прытрымліваецца такога ж меркавання.

Жанчына: Перамен не чакаю. Я ведаю, хто будзе, таму не веру ў перамены абсалютна.
Іншая жанчына: Я вельмі хачу верыць, але я рэалістка.

Фота: адзін з пікетаў у падтрымку Аляксандра Лукашэнкі