У Гомелі паказалі “Гімалаі з даху аўтобуса” (фота)
Выстава з такой назвай адкрылася ў абласным цэнтры ў палацы Румянцавых — Паскевічаў.
На ёй прадстаўленыя фотаздымкі, зробленыя шасцю гомельскімі фатографамі пад час падарожжа аўтаспынам па Індыі. Адкрыццё выставы падзялілася на дзве часткі. Першую, так званую афіцыйную частку, адкрывалі амбасадар Індыі ў Беларусі і, уласна, ініцыятар падарожжа, вядомы гомельскі фатограф Юрый Бірукоў.
У сваю чаргу, апошні з іх апроч прамовы пракаментаваў невялікую слайд-прэзентацыю, зробленую спецыяльна да адкрыцця імпрэзы. Юрый распавеў пра тое, што значную частку падарожжа гамельчукі правялі ў суправаджэнні індыйскіх вайскоўцаў — тыя часцей за ўсё спыняліся і падвозілі іх пад час вандроўкі. А таксама, дзе ў Індыі не водзяцца сланы, але не факт, што іх нельга сустрэць нават і там — у гэтым ён пераканаўся на ўласным досведзе.
Пасля афіцыйнай часткі ўсіх прысутных запрасілі перайсці непасрэдна да агляду самой экспазіцыі.
