У справе бязногага бегуна Пісторыуса з’явіліся новыя падрабязнасці
Паліцыя знайшла скрываўленую крыкетную біту ў доме Оскара Пісторыуса, які абвінавачваецца ў забойстве сваёй дзяўчыны — мадэлі Рэвы Стээнкамп.
Паводле крыніцаў у праваахоўных органах, у доме знайшлі крыкетную біту з вялікай колькасцю крыві, а ў ахвяры зафіксавана чэрапна-мазгавая траўма.
Раней пракурор у судзе паўднёваафрыканскай Прэторыі запатрабаваў для Пісторыуса абвінавачвання ў наўмысным забойстве, але абвінавачваны пераконвае, што пераблытаў дзяўчыну з рабаўніком.
Паліцыя не прызнае версіі Пісторыуса і адзначае, што дзяўчына ў момант забойства была апранута ў начную кашулю.
“Паводле апошніх дадзеных, мы падазраем, што першы стрэл у сцягно адбыўся ў спальні, яна пабегла і схавалася ў ваннай. Затым ён зрабіў яшчэ тры стрэлы праз дзверы”, — паведаміла крыніца.
У чацвер раніцай стала вядома, што ў доме шасціразовага паралімпійскага чэмпіёна бегуна Оскара Пісторыуса знойдзена застрэленай жанчына. Яна аказалася сяброўкай Пісторыуса і якую ён сам жа і забіў, прыняўшы яе за рабаўніка.
Гэта была вядомая паўднёваафрыканская мадэль Рэва Стээнкамп, з якой Пісторыус сустракаўся з канца мінулага года. Першапачаткова сцвярджалася, што яна хацела зладзіць спартсмену сюрпрыз на Дзень святога Валянціна і без папярэджання прабралася ў яго дом.
