Як размяркоўваюць выпускнікоў-педагогаў?

06/04/2012 - 15:05

120406 Martin Razmerkavanne.mp3

Каб размеркавацца ў вёску Буча, Наталля сама брала накіраванне ў раённым аддзеле адукацыі.

“Паеду працаваць бліжэй да бацькоў. Бо ў Мінску без мужа не справіцца, за пакой заплаціць не хопіць”, - тлумачыць студэнтка БДПУ.

Па размеркаванні яна будзе у 40 кіламетрах ад дому. Заробак невялікі – 2,5 мільёны. Цяпер задумваецца, што можа было б лепш плаціць за вучобу.

“... і потым пайсці працаваць не ў школу, бо не ўсе хочуць там працаваць”, - даводзіць выпускніца.

“Найперш разглядаем персанальныя заяўкі. Напрыклад, дзяўчына зрабіла сабе рэгістрацыю, жыве ў Мінску. Ну не будзем жа мы яе ў Чэрыкаўскі раён адпраўляць. Былі выпадкі, калі ў банк размеркавалі. А здараецца не хапае месца і прыходзіцца даваць свабодныя дыпломы”, - расказваюць Еўрарадыё у дэканаце факультэта беларускай і рускай філалогіі БДПУ.

Студэнты самі нясуць заяўкі на размеркаванне. Калі б не прыносілі, маглі б атрымаць свабодны дыплом.

У Хойніках, на мяжы з чарнобыльскай зонай заявак хапае. Летась было 38 чалавек.

“Да нас заўжды прыязджае на працу каля 40 чалавек. Летась было 38 чалавек”, - распавядаюць Еўрарадыё ў Хойніках. І столькі ж маладых спецыялістаў трэба на працу ў абластны горад Брэст!

Пасля дзвухгадовай адпрацоўкі бягуць з раёнаў асабліва хлопцы.

“Мужчыны адпрацоўваюць 2 гады і з’язджаюць. Бо ў асноўным гаражане прыязджаюць у сельскія школы. Ім цяжка, яны з’язджаюць”, - скардзяцца ў Ляхавіцкім Упраўленні адукацыі.

Дарэчы, ВНУ могуць размяркоўваць і платнікаў, па жаданні выпускнікоў. Летась, на ўвесь БДПУ такіх было толькі 28 чалавек. Ці не збягуць пасля двух гадоў размеркавання…