Стала вядома, калі ў Беларусі пацяплее
На гэтым тыдні ў Беларусі пацяплее. Пра гэта агенцтву БЕЛТА паведаміў начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Дзмітрый Рабаў.
На пачатку тыдня, па словах сіноптыка, захаваецца халаднаватае надвор'е. У аўторак будзе без ападкаў. У асобных раёнах уначы і зранку чакаецца слабы туман. Тэмпература паветра ўначы будзе +2...+8 градусаў, удзень — ад 10 да 16 вышэй за нуль.
У сераду месцамі прагназуюцца кароткачасовыя дажджы. У асобных раёнах уначы і зранку будзе туман. Уначы тэмпература паветра чакаецца 2-9 градусаў цяпла, удзень — +10...+16, па паўднёвым захадзе — нават да +18.
У чацвер на Беларусь прыйдзе атмасферны фронт з Заходняй Еўропы і прынясе на большую частку краіны кароткачасовыя дажджы. Уначы сіноптыкі прагназуюць ад 4 да 11 градусаў цяпла, удзень — 11-17 са знакам "плюс", па паўднёвым захадзе — да +19.
У пятніцу дажджоў будзе менш, павысіцца атмасферны ціск, прыйдуць больш цёплыя паветраныя масы з паўднёвага захаду Еўропы. У выніку надвор'е палепшыцца. Тэмпература паветра ўдзень чакаецца ад 14 да 20 цяпла.
