Старшыня Парламенцкай асамблеі АБСЕ Крысцін Мутанен прыбыла ў Мінск
4 ліпеня ў Мінск прыбываюць удзельнікі 26-й летняй сесіі Парламенцкай асамблеі АБСЕ. Да "Прэзідэнт-гатэля", дзе будуць праходзіць асноўныя мерапрыемствы сесіі, пад'язджаюць аўтобусы з дэлегатамі. У працы ПА АБСЕ прыме ўдзел каля 700 чалавек.
Сёння ж у сталіцу Беларусі прыбыла старшыня Парламенцкай асамблеі АБСЕ Крысцін Мутанен.
"Мінск даўно ўжо стаў пляцоўкай, на якой збіраюцца важныя форумы, абмяркоўваюцца пытанні па пабудове свету. Мы ўжо бачым Беларусь не толькі як мост паміж Усходам і Захадам, але і паміж рознымі дзяржавамі, то бок, гэта ўжо важная міжнародная пляцоўка", — цытуе Крысцін Мутанен Агенцтва тэлевізійных навінаў.
Парадак дня сесіі складваецца з пасяджэнняў трох Агульных камітэтаў. Па-першае, гэта Агульны камітэт па дэмакратыі, правах чалавека і гуманітарных пытаннях. Па-другое, Агульны камітэт па эканамічных пытаннях, навуцы, тэхналогіях і навакольным асяроддзі. Па-трэцяе, Агульны камітэт па палітычных пытаннях і бяспецы.
Сесія ПА АБСЕ павінна завяршыцца прыняццем Мінскай дэкларацыі. Дакумент будзе змяшчаць рэкамендацыі для нацыянальных урадаў, парламентаў і міжнароднай супольнасці па рэагаванні на актуальныя выклікі і пагрозы, якія нясе цяперашні час.
