Судзілі затрыманых з музыкамі пад Мінскам, працяг — у сераду

03/08/2021 - 19:30

3 жніўня ў судзе Мінскага раёна судзілі людзей, затрыманых разам з музыкамі гурта IRDORATH на лецішчы пад Мінскам. Некалькі чалавек былі аштрафаваныя. Як паведамляе тэлеграм-канал @viasnanazirae, суддзя Антон Колабаў прысудзіў штраф (30 базавых — 870 рублёў) удзельніцы гурта BY CRY 39-гадовай Аляксандры Грахоўскай. За тое, што яна "адмовілася адчыняць браму для правядзення следчых дзеянняў, чым аказала непадпарадкаванне супрацоўніку міліцыі".

Грахоўская заявіла, што на лецішчы няма брамы — толькі зламаная брамка: "Як можна не адчыніць тое, што і так не зачыненае?!". Таму сваёй віны яна не прызнала. Жанчына заявіла, што прыйшла на дзень народзінаў да сяброўкі. Але перад пачаткам святкавання "з двух бакоў... пабеглі людзі ў вайсковай форме і пачалі страляць". 15 чалавек паклалі на зямлю, у іх забралі тэлефоны. Толькі пазней жанчынам дазволілі сесці на канапу.

Той жа суддзя Колабаў аштрафаваў яшчэ некалькіх затрыманых — Шулякову — на 30 базавых (870 рублёў), Юлію Варламаву — на 40 базавых (1160 рублёў), Вольгу Міхно — на 35 базавых (1015 рублёў). 4 жніўня будуць разглядацца адміністрацыйныя справы Яўгена Срацэнскага і Міхаіла Аракчаева.

Суддзя Вадзім Казей пачаў разглядаць справы Аляксандра Сінкевіча, Дзмітрыя Шыманскага і Аляксея Палаўчэні (барабаншчыка гурта IRDORATH), але зрабіў перапынак да серады. Яны заявілі, што гатавалі шашлыкі перад тым, як з’явіліся сілавікі ў камуфляжы і ў масках. Мужчыны таксама здзівіліся абвінавачванню наконт "зачыненай брамы".

Шыманскі быў затрыманы выпадкова: ехаў на мапедзе каля 23-й гадзіны, калі ўжо гадзіну праходзіў ператрус, убачыў машыну сябра і спыніўся. Было цёмна, і ён спытаўся: хто корпаецца ў машыне? "Ты сюды прыехаў?", — спыталіся ў яго. Ён пацвердзіў. "Класна, дачакаліся цябе!", — адказалі сілавікі і забралі яго.

2 жніўня на лецішчы пад Мінскам агулам затрымалі 16 чалавек, сярод іх — удзельнікаў беларускага музычнага фэнтэзі-фолк гурта IRDORATH. Там святкаваўся дзень народзінаў вакалісткі гурта Надзеі Калач. У МУС заявілі, што супраць шасці затрыманых распачалі крымінальную справу "за арганізацыю дзеянняў, якія груба парушаюць грамадскі парадак" — за пратэсты 2020 года.

Праваабаронцы паведамляюць, што ў статусе падазраваных 5 чалавек: Уладзімір Калач, Надзея Калач, Пётр Марчанка, Юлія Марчанка (Юніцкая) і Антон Шніп.