"Сямейны рэферэндум" у Румыніі праваліўся

Рэферэндум па змене Канстытуцыі Румыніі пацярпеў крах. Паводле дадзеных цэнтральнай выбарчай камісіі, на галасаванне прыйшлі ўсяго 20,41% насельніцтва, то бок 3 731 704 чалавекі.

Для таго, каб нацыянальны рэферэндум аб пераглядзе Канстытуцыі з нагоды пераазначэння сям'і быў прызнаны сапраўдным, у рэферэндуме мусілі ўзяць удзел не менш за 30% выбаршчыкаў, а менавіта 5 483 548 чалавек з правам голасу.

Рэферэндум быў арганізаваны па ініцыятыве, якая прасоўвалася Кааліцыяй за сям'ю ў канцы 2015 года, і датычыў унясення зменаў у артыкул 48 Канстытуцыі Румыніі, з тым, каб фраза "сям'я заснаваная на свабодным шлюбе па ўзаемнай згодзе паміж сужэнцамі" была замененая на "сям'я заснаваная на свабодным шлюбе па ўзаемнай згодзе паміж мужчынам і жанчынай".

Праваабарончыя арганізацыі бачаць у гэтай ініцыятыве ўціск правоў меншасцяў ЛГБТ. Так, эксперты звяртаюць увагу на тое, што "Сямейны рэферэндум" ставіць пытанне аб цяперашнім статусе Румыніі і яе месцы ў Еўрапейскім саюзе.

Крысці Данілец, вядомы румынскі суддзя, падкрэслівае, што калі ўносяцца папраўкі ў Канстытуцыю краін — сябраў Еўрасаюза, патрабуецца меркаванне Венецыянскай камісіі, якога Румынія гэтым разам не спытала. "Румынія рабіла так пры папярэднім пераглядзе або яго спробах. Цяпер жа яна гэтага не зрабіла".