Тэракт у прадмесцях сталіцы Лівана — дзясяткі загінуўшых, сотні параненых

У сталіцы Лівана адбыўся падвоены тэракт. У выніку яго, паводле папярэдніх дадзеных, загінулі 37 чалавек, яшчэ 180 мірных жыхароў параненыя, паведамляюць сусветныя СМІ.

Выбухі адбыліся ўвечары 12 лістапада ў прадмесцях Бейрута на вуліцы побач з будынкам паліцыі. Два тэрарысты-смяротнікі прывялі ў дзеянне выбуховыя прылады, замацаваныя на паясах.

Выбухі прагрымелі з інтэрвалам менш за 10 хвілін. Другі адбыўся ў момант, калі людзі пачалі дапамагаць пацярпелым. Месца здарэння ачэплена ліванскай арміяй і супрацоўнікамі паліцыі.

Па дадзеных некаторых ліванскіх СМІ, на месцы тэракту быў трэці смяротнік, але яго выбуховае прыстасаванне не спрацавала. Паліцыя дадзеныя звесткі афіцыйна не пацвердзіла.

У пачатку тыдня тэрарысты ўзарвалі замінаваны матацыкл у горадзе Эрсаль на сірыйска-ліванскай мяжы. Загінулі восем чалавек. У сераду патруль ліванскай арміі выявіў і абясшкодзіў выбуховае прыстасаваньне ў горадзе Трыпалі на поўначы Лівана.

Фота: REUTERS/ Hasan Shaaban