У аэрапорт у Калінінградзе накіравалі спецтэхніку Балтыйскага флота
У аэрапорт Храбрава ў Калінінградзе накіравалі спецтэхніку Балтыйскага флота. У ноч на сераду там здзейсніў аварыйную пасадку пасажырскі самалёт з Масквы, які выкаціўся за межы ўзлётна-пасадачнай паласы. На яго борце былі 174 чалавекі. Меддапамога спатрэбілася траім з іх. Крымінальную справу распачалі па факце аказання паслуг, якія не адпавядаюць патрабаванням бяспекі.
Як інфармуе РІА "Новости", у аэрапорце не знайшлося спецтэхнікі, каб вярнуць самалёт на ўзлётна-пасадачную паласу. У выніку часова аэрапорт закрылі. Увечары стала вядома, што ў Храбрава накіравалі калону з пяці адзінак спецыяльнай інжынернай тэхнікі Балтыйскага флота — чатыры цяжкія цягачы і адна бронемашына.
