На чыгуначнай станцыі пад Мінскам з кантэйнера выцекла высокатаксічнае хімічнае рэчыва
Разліў хімічнага рэчыва на станцыі пад Мінскам / МНС
Высокатаксічнае хімічнае рэчыва талуілендыізацыянат выцекла з кантэйнера на тэрыторыі чыгуначнай станцыі Мінскага раёна, паведамляе прэс-служба МНС.
На месцы аварыі працавалі ратавальнікі. Талуілендыізацыянат моцна раздражняе слізістыя абалонкі вачэй, дыхальныя шляхі і скуру. Пры ўдыханні пары можа развіцца астма.
Ратавальнікі адчапілі платформу з кантэйнерам ад цягніка і накіравалі на перагон для разгрузкі бочак і выяўлення месца цечы. Выявілася, што былі пашкоджаныя чатыры 200-літровыя бочкі, адна бочка была зусім пустой.
Разліў небяспечнага хімічнага рэчыва ўнутры кантэйнера нейтралізавалі з выкарыстаннем кальцынаванай соды. Пашкоджаныя бочкі загрузілі назад у кантэйнер і адправяць у пункт прызначэння на аўтамабілі.
Пацярпелых пры здарэнні няма. Затрымкі пасажырскіх і грузавых цягнікоў не зарэгістраваныя.
