Жыхароў віцебскага дома, каля якога праваліўся грунт, адселяць

У Віцебску праводзяцца работы па ўмацаванні грунту каля жылога пяціпавярховага дома на вуліцы Шрадэра.

Як заяўляюць у МНС, цэласнасць падмурка дома не парушаная.

На час аднаўленчых работ вырашана адсяліць жыхароў дома — арыенціровачна на суткі. "Праводзіцца пакватэрны абыход грамадзян, працуюць спецыялісты псіхалагічнай службы МНС", — паведамілі ў ведамстве.

Спецыялізаваныя службы расчышчаюць пад'езд да месца правалу для ўкладкі пліт, падсыпкі і ўмацавання грунту. Таксама яны кантралююць стан падмурка жылога дома.

На месцы здарэння працуюць чатыры машыны і сем спецыялістаў, у тым ліку адна машына і чатыры работнікі МНС.

Як паведамлялася раней, пасля дажджоў адбыўся правал грунту на месцы, дзе пракладалі каналізацыйную поліэтыленавую трубу. Пра небяспеку правалу ў гэтым месцы яшчэ тры месяцы таму паведамляў мясцовы жыхар.