У Беларусі прапануюць памяняць даты правядзення цэнтралізаванага экзамена
Цэнтралізаваны экзамен / sb.by
Дату правядзення цэнтралізаванага экзамену ў новым навучальным годзе прапануюць памяняць. Пра гэта заявіла дырэктарка Нацыянальнага інстытута адукацыі Валянціна Гінчук, піша "Настаўніцкая газета".
Па яе словах, з ініцыятывай выступілі настаўнікі. Яны прапануюць перанесці іспыты на 27 і 30 траўня. Сёлетнія выпускнікі здавалі ЦЭ 14 і 21 траўня.
Адпаведна перанясуць і выпускныя вечары ў школах, якія сёлета адбыліся 10 чэрвеня.
Сістэму падліку балаў абяцаюць зрабіць "максімальна празрыстай, зразумелай кожнаму ўдзельніку ЦЭ і кожнаму з бацькоў". Сёлета пры падліку балаў на ЦЭ адбыўся скандал: школьнікі і іх бацькі былі абураныя нізкімі вынікамі. Улады правялі перападлік, а потым стварылі міжведамасную камісію для праверкі. Яна парушэнняў не знайшла, але прапанавала памяняць сістэму падліку.
