У Лондане эвакуявалі дзве станцыі метро праз страляніну
Станцыя "Оксфард-сёркус" ў цэнтры Лондана зачыненая, пасажыры з яе эвакуяваныя, паведамляе Бі-Бі-Сі.
Лонданская паліцыя рэкамендуе ўсім, хто знаходзіцца на Оксфард стрыт, зайсці ў будынкі і па магчымасці пазбягаць гэтага раёна. Паліцыя атрымала вялікую колькасць паведамленняў пра страляніну на станцыі метро і прылеглай да яе вуліцы.
Праваахоўнікі адзначаюць, што пакуль яны не выявілі ніякіх слядоў падазраваных, пацярпелых або стрэлаў.
"Паліцыя рэагуе на гэты інцыдэнт так, як калі б ён быў звязаны з тэрарызмам. На месцы знаходзяцца узброеныя супрацоўнікі паліцыі", — дадалі ў паліцыі Лондана.
Транспартная паліцыя паінфармавала, што мае звесткі пра жанчыну, якая атрымала нязначныя траўмы падчас эвакуацыі са станцыі. Інфармацыяй пра іншых пацярпелых ведамства не валодае.
Звесткі пра "інцыдэнт" на Оксфард-сёркус пачалі паступаць каля 16.37 паводле мясцовага часу (19:37 паводле мінскага).
Над месцам здарэння патрулююць два верталёты.
Акрамя "Оксфард-сёркус" зачынілі бліжэйшую да яе станцыю метро "Бонд-стрыт".
