У Мастоўскім раёне маршрутка ўрэзалася ў трактар. Ёсць пацярпелыя
Фота з месца аварыі / @pul4region
6 красавіка маршрутка "Брэст — Гродна" ўрэзалася ў трактар. Ёсць пацярпелыя, у тым ліку дзеці, — паведамляе прэс-служба Гродзенскага аблвыканкама.
ДТЗ адбылося ў Мастоўскім раёне на трасе Р-44 паміж Лунай і Свіслаччу. На неабазначаным скрыжаванні ля павароту на вёску Жылічы кіроўца маршруткі пайшоў на абгон трактара МТЗ з цыстэрнай. Аднак трактар у гэты момант пачаў паварочваць налева. Адбылося сутыкненне, маршрутка перакулілася на левы бок.
Разам з кіроўцай у салоне маршруткі знаходзілася 20 чалавек. Дзесяць пацярпелі, у тым ліку двое дзяцей. Дзевяць чалавек з рознымі траўмамі дастаўленыя ў бальніцы Гродна. Стан усіх ацэньваецца як стабільны, пагрозы жыццю няма.
На месцы ДТЗ працуюць следча-аператыўныя групы. Вырашаецца пытанне ўзбуджэння крымінальнай справы. Па папярэдняй інфармацыі рамянямі бяспекі ніхто з пасажыраў не карыстаўся.
