У Мінску можа з’явіцца вуліца імя Аркадзя Смоліча
У Мінску можа з’явіцца вуліца імя Аркадзя Смоліча (1891 — 1938). Ушанаваць памяць навукоўца і дзеяча нацыянальнага адраджэння сталічным уладам прапанавала Беларуская сацыял-дэмакратычная партыя (Грамада). З адказу чыноўнікаў вынікае, што прапанова аб наданні імя Смоліча адной з вуліц Мінска ўключана ў пералік імёнаў знакамітых дзеячаў краіны, якія паступілі ад арганізацый і грамадзян для ўвекавечання ў тапаніміцы сталіцы. Рашэнне аб наданні назвы новай вуліцы альбо перайменаванні старой будзе прымаць адпаведная камісія.
Адзначым, што 29 верасня бягучага года споўнілася 125 гадоў з дня нараджэння сябра Беларускай Сацыялістычнай Грамады, міністра сельскай гаспадаркі Беларускай Народнай Рэспублікі Аркадзя Смоліча. Ён таксама вядомы сваім першым падручнікам па геаграфіі Беларусі. Смоліч быў рэпрэсаваны савецкімі ўладамі, пасмяротна рэабілітаваны.
