У Мінску прапанавалі ўвесці "зімовыя" забароны на паркоўку
Паркоўку прапануюць часткова забараніць уздоўж праезнай часткі / "Мінск-Навіны"
У Мінску вывучаюць пытанне ўвядзення сезоннай забароны на паркоўку ўздоўж праезнай часткі, піша агенцтва "Мінск-Навіны" са спасылкай на гарадскіх чыноўнікаў. Намеснік старшыні Мінгарвыканкама Алег Корзун даручыў сталічнай Дзяржаўтаінспекцыі разам з "Гаррамаўтадарам" прапрацаваць пытанне.
Гаворка ідзе пра часовую забарону на паркоўку ўздоўж праезнай часткі зімой, каб прыборачная тэхніка магла лягчэй спраўляцца са сваёй задачай — ачысткай вуліц ад снегу. Сутнасць прапановы — у тым, каб у цотныя дні забараніць паркоўку, напрыклад, з цотнага боку вуліцы, а ў няцотныя дні — з няцотнага. Для гэтага ўздоўж праезнай часткі ўсталююць спецыяльныя дарожныя знакі.
Гэтая мера павінна як мінімум дапамагчы дарожнікам планаваць працу, мяркуюць у Мінгарвыканкаме.
