У Мінску затрымалі ўладальнікаў агенцтва нерухомасці "Куб"

20 красавіка ў Мінску затрымалі Васіля і Алу Раманенкаў — уладальнікаў агенцтва нерухомасці "Куб". Як паведамляюць праваабаронцы, да іх дадому ўварваліся супрацоўнікі ГУБАЗ і САХР.

Васілю выставілі абвінавачанні паводле артыкуле 361-1 Крымінальнага кодэкса (стварэнне экстрэмісцкага фармавання або ўдзел у ім). Мужчына быў зарэгістраваны у плане "Перамога". 

У чым вінавацяць ягоную жонку, пакуль невядома. Сваякі затрыманых кажуць, што Ала ў плане "Перамога" зарэгістраваная не была. Аднак у сацсетках яна пакінула некалькі пастоў супраць вайны Расіі ва Украіне. 

Дома ў Раманенкаў правялі агляд, канфіскавалі жорсткі дыск.

Сваякі кажуць, што ноч Ала і Васіль Раманенкі правялі на Акрэсціна. Сёння іх павінныя судзіць.