У Пакістане ад спёкі загінулі сотні чалавек

У Пакістане ад спёкі загінулі каля 600 чалавек. Моргі перапоўненыя ахвярамі цеплавога ўдару, як і бальніцы, куды трапілі тысячы чалавек. Асабліва шмат пацярпелых у Карачы, дзе тэмпература паветра перавысіла 40°C, але з-за высокай вільготнасці адчувалася як 49-50°C, паведамляе bbc.com.

Штодня ў гарадскі морг Карачы паступаюць ад 30 да 40 целаў загінулых. І сітуацыя пагаршаецца. Толькі ў аўторак сабралі 141 цела. Большасць з іх з бедных раёнаў горада. Каб вызваліць месцы ў моргу, незапатрабаваныя целы хаваюць раней, чым звычайна.

Хваля спёкі накрыла Пакістан у мінулыя выходныя. Улады адкрылі спецыяльныя цэнтры ў надзеі аказаць дапамогу людзям. Але далёка не ўсе здолелі яе своечасова атрымаць.