За ўсю гісторыю Беларусь падала на “Оскар” толькі два фільмы
1 ліпеня сайт Variety паведаміў, што беларускі фільм “Крышталёвы лебедзь” маладой рэжысёркі Дар’і Жук вылучаны на прэмію “Оскар” у намінацыі “Лепшы замежны фільм”. Чатыры дні ўся беларуская кінатусоўка спрабавала зразумець, хто і як адправіў стужку ў Амерыкаснкую кінаакадэмію. Бо, каб зрабіць гэта, у краіне мусіць працаваць “Оскараўскі камітэт”, пра які ў Беларусі ніколі ніхто не чуў.
А ён ёсць.
Пра гэта Еўрарадыё распавёў мастацкі кіраўнік кінастудыі “Беларусьфільм” Ігар Поршнеў. “Оскараўскі камітэт” з’явіўся ў нашай краіне яшчэ ў 1990-я, але неўзабаве спыніў сваю дзейнасць на цэлых 15 гадоў. Такія правілы “Оскара”: нацыянальны камітэт перапыняе дзейнасць, калі краіна нічога не вылучае на прэмію цягам пяці гадоў.
“У Беларусі аднавіў існаванне “Оскараўскі камітэт”. Вось, у мяне ляжыць дакумент з Лос-Анжэлеса, у ім сказана, што наш камітэт ухвалены, — кажа Ігар Поршнеў. — “Оскараўскі камітэт” у Беларусі існаваў у 90-я гады, я дакладна ведаю, таму што я асабіста рыхтаваў дакументы па фільме "Я — Іван, ты — Абрам", гэта беларуска-французскі фільм, ён нават прайшоў нейкія намінацыі. Другі раз падаваўся расійска-беларуска-нямецкі фільм "З пекла ў пекла"”.
Цяпер да падачы на Оскар у намінацыі “Найлепшы замежны фільм” рыхтуюць карціну Дар’і Жук “Крышталёвы лебедзь”. Дакументы яшчэ не гатовыя, не адправілі. Па словах Поршнева, гэта доўгі працэс.
Сусветная прэм’ера “Крышталёвага лебедзя” адбылася 30 чэрвеня на кінафестывалі ў Карлавых Варах. Дзеянне фільма разгортваецца ў Беларусі 1990-х гадоў — галоўная гераіня падаецца на амерыканскую візу, але ўказвае ў анкеце недакладны нумар тэлефона. Каб адказаць на праверачнае тэлефанаванне, яна вымушаная на тыдзень з'ехаць у невялікі беларускі гарадок. Стужка паказвае жыццё людзей той эпохі са стыхійнымі рынкамі, падпольнымі моладзевымі рэйвамі і марамі пра эміграцыю.
“Крышталёвага лебедзя” амаль цалкам здымалі ў Беларусі. У вытворчасці бралі ўдзел беларускія, амерыканскія, нямецкія і расійскія кінакампаніі.
Дар’я Жук — ураджэнка Мінска, якая цяпер жыве ў ЗША. Яна скончыла Гарвардскі і Калумбійскі ўніверсітэты, працавала на канале HBO. Зняла некалькі кароткаметражных фільмаў, якія прынеслі ёй лаўрэацтва шэрагу кінафестываляў.
