Заіка: Заява Лукашэнкі пра платны выезд за мяжу супярэчыць усім нормам

Заява Аляксандра Лукашэнкі пра пошліну для людзей, якія едуць за мяжу на шопінг, чыста эмацыйная, і наўрад ці гэта дойдзе да рэальнага заканадаўчага акта. Такое меркаванне ў размове з Еўрарадыё выказаў эканамічны аналітык Леанід Заіка. Паводле яго слоў, такое абмежаванне будзе парушаць усе магчымыя міжнародныя нормы, у тым ліку “Хартыю аб правах чалавека” і пункт аб вольным перамяшчэнні.

"Думаю гэта эмацыйны ўсплёск. Эмоцыі. Прэзідэнт вельмі перажывае. Перажывае за лёс краіны. Зразумела, калі нехта паедзе набываць бульбу ў Літву, якая там можа танней, чым у Беларусі, — на гэта зневажальна глядзець. У нас па восені нейкія дзіўныя рэчы назіраюцца: то прапануюць браць падаткі з непрацуючых (а гэта 440 тысяч чалавек), то прапануюць браць грошы за выезд з краіны на шопінг", — адзначыў Заіка.

Нагадаем, 6 верасня падчас наведвання завода “Мотавела” кіраўнік Беларусі заявіў пра магчымасць увесці ў краіне "выязную пошліну" для фізічных асоб, якія едуць за мяжу па тавары.

"Нашы людзі сёння, якія нас усё крытыкуюць – бедная, жабрацкая краіна, а да 3 мільярдаў долараў вывозяць за мяжу ў Еўрасаюз і ўвозяць барахло, якое мы таксама выпускаем. Дык вось, я даўно даручыў: аж да таго, што з'язджаеш за межы краіны па гэтае барахло, заплаці пошліну", — перадае interfax.by словы беларускага лідара.

"Гэта будзе так: мы цябе на мяжы абслугоўваем, плаці 100 долараў з носа і едзь за мяжу", — заявіў кіраўнік дзяржавы.