Золатавалютныя рэзервы Беларусі скараціліся на 90,8 млн долараў
За сакавік. Страты ЗВР за тры месяцы 2015 года склалі больш за 498 млн долараў.
Золатавалютныя рэзервы Беларусі за сакавік скараціліся на 90,8 млн долараў. На 1 красавіка яны складалі $4 млрд 560,5 млн. Пра гэта паведамляе Нацыянальны банк Беларусі. Адзначым, што гэтыя разлікі зробленыя ў адпаведнасці з метадалогіяй, якой карыстаецца Міжнародны валютны фонд. А ў нацыянальным вызначэнні ЗВР зменшыліся на 262,8 млн долараў і складалі 4 млрд 933,3 млн долараў, інфармуе БЕЛТА.
Як паведамляе "Интерфакс-Запад", за першыя тры месяцы бягучага года золатавалютныя рэзервы нашай краіны скараціліся на 498,6 млн долараў (гэта 9,9%) — да 4 млрд 560,5 млн долараў. Па нацыянальных жа стандартах ЗВР знізіліся больш істотна — на $722,7 млн (на 12,6%).
Адзначаецца, што на зніжэнне ЗВР Беларусі ў сакавіку паўплывала "пагашэнне ўрадам і Нацыянальным банкам знешніх і ўнутраных абавязацельстваў у замежнай валюце ў поўным аб'ёме".
Фота: ria.ru, Fotolia