Уся адказнасць за наступствы для Беларусі будзе ляжаць на Лукашэнку — Ціханоўская

Лідарка беларускіх дэмакратычных сіл Святлана Ціханоўская заявіла, што сур’ёзна ставіцца да ўсіх сігналаў з боку Украіны, якія датычацца ўцягвання Беларусі ў вайну і бяспекі ў рэгіёне. Заява была апублікаваная ў яе тэлеграм-канале.

Паводле слоў Ціханоўскай, Украіна мае ўсе падставы праяўляць пільнасць, паколькі менавіта з тэрыторыі Беларусі ў 2022 годзе пачалося расійскае ўварванне, а рэжым Аляксандра Лукашэнкі працягвае падтрымліваць расійскую агрэсію.

На гэтым тыдні ў Кіеве Місія дэмакратычных сіл Беларусі ва Украіне правяла круглы стол, на якім эксперты і прадстаўнікі BELPOL прадставілі інфармацыю пра мілітарызацыю Беларусі і планы Расіі па далейшым уцягванні краіны ў вайну.

"Украіна размаўляе з Лукашэнкам мовай сілы, бо менавіта яе ён разумее лепш за ўсё. Лукашэнка павінен усвядоміць: уся адказнасць за магчымыя наступствы для краіны будзе ляжаць на ім", — гаворыцца ў заяве Ціханоўскай.

Яна адзначыла, што рэжым Лукашэнкі застаецца саўдзельнікам агрэсіі, прадастаўляючы тэрыторыю і інфраструктуру для ўдараў па ўкраінскіх гарадах, а таксама пастаўляючы Расіі зброю, паліва і абсталяванне для ваеннай машыны.

Паводле слоў Ціханоўскай, калі Лукашэнка сапраўды хоча міру, ён павінен даказаць гэта не словамі, а канкрэтнымі дзеяннямі — спыніць любую падтрымку агрэсіі.

Ціханоўская таксама звярнулася да беларусаў з заклікам не паддавацца прапагандзе і не дазваляць уцягнуць сябе ў чужую вайну.

"Наша агульная задача — не дапусціць, каб Беларусь была канчаткова ўцягнутая ў вайну. Гэта адпавядае найперш нацыянальным інтарэсам нашай краіны", — падсумавала яна.

Прэзідэнт Украіны Уладзімір Зяленскі выставіў Аляксандру Лукашэнку ўльтыматум.

Зяленскі заявіў, што на тэрыторыі Беларусі ўздоўж мяжы "знаходзіцца тэхніка, якая карэктуе агонь па ўкраінскім насельніцтву, менавіта па насельніцтву".

Прэзідэнт Украіны перакананы, што Лукашэнку хопіць тыдня, каб прыбраць усю гэтую тэхніку.