Украіна не будзе перашкаджаць пастаўкам паліва з Беларусі ў Расію — Зяленскі

Украіна не будзе перашкаджаць пастаўкам паліва з Беларусі ў Расію. Пра гэта падчас размовы з журналістамі 9 ліпеня заявіў Уладзімір Зяленскі.

На яго думку, сам факт, што "краіна-бензакалонка" вымушаная шукаць бензін у суседзяў "гучыць як гістарычны анекдот". Прэзідэнт Украіны нагадаў, што расіяне традыцыйна экспартавалі энергарэсурсы. А "сёння займаюцца тым, каб хоць недзе знайсці паліва".

Згадаў Зяленскі і першага расійскага прэзідэнта. Паводле яго, калі б усё гэта мог пабачыць Барыс Ельцын, ён, напэўна, не выбраў бы Пуціна сваім пераемнікам.

Пасля шэрагу ўкраінскіх удараў па расійскіх НПЗ у РФ ўзнік востры дэфіцыт бензіну. Цяпер расіяне шукаюць бензін у іншых краінах. На Пецярбургскай біржы продаж беларускага бензіну скончыўся ў першыя ж дні ліпеня — мяркуецца, што пастаўшчыкі маглі проста распрадаць месячны запас. Казахстан увёў абмежаванні для "бензінавага турызму" — не больш за адзін уезд-выезд за суткі.