26-гадовы магілёвец жорстка збіў 4-гадовую дзяўчынку

Упраўленне Следчага камітэта па Магілёўскай вобласці пачало крымінальную справу на 26-гадовага жыхара Магілёўскага раёна. Яго падазраюць у наўмысным прычыненні цяжкага цялеснага пашкоджання заведама малалетняму дзіцяці.

Зранку 31 сакавіка чатырохгадовую дзяўчынку ў непрытомным стане з цялеснымі пашкоджаннямі знайшлі лекары брыгады хуткай меддапамогі. Брыгаду выклікалі ў вёску Амховая-1 Магілёўскага раёна. Медыкі выклікалі на месца здарэння следча-аператыўную групу.

Паводле папярэдніх звестак следства, 26-гадовы мужчына, раней судзімы, збіў дачку сваёй сужыцелькі. Потым мужчына пайшоў з дому, пакінуўшы дзяўчынку адну. Калі ён вярнуўся, то знайшоў дзіця ў непрытомным стане. Маці дзяўчынкі ў гэты час знаходзілася на працы.

Мужчыну выставілі абвінавачанне ў наўмысным прычыненні цяжкага цялеснага пашкоджання ў дачыненні да заведама малалетняй. Яго ўзялі пад варту.

Следства праводзіць агляды, допыты і іншыя следчыя дзеянні. З дому абвінавачанага забралі рэчавыя доказы і накіравалі іх на экспертызу. 

Меддапамогу дзяўчынцы аказваюць дактары Магілёўскай абласной дзіцячай лякарні.