77 удараў малатком: у Бабруйску пачаўся суд па забойстве дзвюх дзяўчат

04/12/2018 - 17:20

4 снежня ў Бабруйску пачаўся суд па справе аб жорсткім забойстве дзвюх дзяўчат.

Як паведамлялася раней, трагедыя адбылася сёлета 20 ліпеня. Зранку ў міліцыю затэлефанавала дзяўчына і папрасіла дапамогі. Яна з сяброўкай зачыніліся ў ванным пакоі, а да іх спрабуе ўламіцца мужчына. Дзяўчына няправільна назвала адрас, таму дапамога міліцыі спазнілася. Калі праваахоўнікі затрымалі 36-гадовага непрацуючага бабруйчаніна, то ў ваннай у яго знайўлі целы дзвюх дзяўчат са слядамі гвалтоўнай смерці. Адной было 26 гадоў, другая — на год старэйшая.

Суддзя агучыў фрагменты біяграфіі падсуднага, піша komkur.info. Мужчына не вельмі добра вучыўся ў школе, Мае сярэднюю спецыяльную адукацыю, разведзены, дзяцей няма, у войску не служыў. Апошняе месца працы — прыватная фірма па вырабе вокнаў. Мае чатыры судзімасці — рабаванне, крадзеж, злоснае хуліганства, цяжкія цялесныя пашкоджанні, якія прывялі да смерці. Агулам за кратамі ён правёў амаль 12 гадоў са сваіх 36.

Дзяржабвінаваўца паведаміў, што адной з дзяўчат мужчына нанёс 77 удараў малатком і рукамі ў жыццёва важныя органы, у тым ліку 48 — па галаве. У другой ахвяры — 16 ран, амаль усе — на галаве і шыі. Потым мужчына расчляніў і хацеў схаваць трупы.

Падсудны прызнаў абвінавачванне часткова. Ён заявіў, што прымаў "меры да расчлянення і ўтойвання трупаў".

Агучваць поўную аўтабіяграфію ён не пажадаў. Сказаў толькі, што ва ўзросце 10 гадоў застаўся без бацькі, бо той загінуў.

Мужчына распавёў, што ўвечары 19 ліпеня піў піва з сябрамі ў двары, потым ён вырашыў працягнуць вечар у кавярні "Прэстыж". Грошы на адпачынак ўзяў у сужыцелькі. У кватэры, дзе потым адбылося забойства, пастаянна ніхто не жыў, яна належыць маці падсуднага.

Агулам напярэдадні паходу ў кавярню мужчына выпіў чатыры літры піва. У кавярні, па яго словах, выпіў чарку гарэлкі і чарку каньяку. Адна з будучых ахвяраў падышла да яго, але ён заявіў, што не ведае яе. На самоце ён "адпачываў" да чацвёртай раніцы, а потым вырашыў ехаць дадому. На стаянцы таксовак да яго падышла ранейшая дзяўчына, але ўжо з сяброўкай, і папрасіла падвезці.

У выніку ўсе апынуліся ў злашчаснай кватэры на вуліцы Лынькова, прычым па дарозе закупілі яшчэ піва. Пра далейшыя падзеі абвінавачаны сказаў: "70 адсоткаў усіх далейшых падзей я не памятаю".

Мужчына заявіў, што дзяўчаты напрасіліся да яго дадому, бо ім не было дзе працягваць адпачынак. На пытанне суддзі "Ці збіраліся ўступіць з імі ў інтымную сувязь?" падсудны адказаў адмоўна.

Зранку ён пачаў збірацца на працу, але не знайшоў ключоў. Адна з дзяўчат са смехам заявіла, быццам выкінула звязку ключоў у акно. Мужчына знайшоў ключы на зямлі каля пад'езда. Па яго словах, вярнуўшыся, ён пабачыў, як адна з госцяў корпаецца ў тумбачцы. Пачуўшы, што цяпер пачнецца няпростая гутарка, дзяўчына c сяброўкай зачыніліся ў ваннай. Мужчына стаў выбіваць дзверы.

"Я заўважыў, як адна з іх спрабуе на мяне напасці, трымаючы ў руцэ нейкі прадмет, і стаў абараняцца", — тлумачыць ён свае далейшыя дзеянні.

"Нейкім прадметам" быў малаток, які абвінавачаны хутка забраў. Гэтым малатком ён і забіў дзяўчыну. Другая ўвесь гэты час была на кухні. Падсудны заявіў, што яна таксама спрабавала напасці на яго, калі ён выйшаў з ваннай. "Бачу, што бяжыць на мяне з нажом у руках са словамі "я цябе, с...ка, цяпер завалю", — распавёў мужчына на судзе. Мужчына забраў у яе нож і нанёс ім паўтара дзясятка раненняў. Потым ён зняў вопратку з целаў і змыў кроў з падлогі.

Прыбраўшы падлогу, пайшоў спаць. Прачнуўшыся каля 11-й раніцы, сабраў вопратку ахвяр у пакет і выкінуў у смецце. Сам пайшоў у краму і купіў 1,5 літра піва. Свой стан той раніцай мужчына апісаў так: "Хацелася павесіцца, але вяроўку не знайшоў". Перад выхадам з дому ён вымыў нож і малаток ды паклаў у скрыню для інструментаў.

Маці 27-гадовай бабруйчанкі, забітай малатком, распавяла пра сваю дачку: таварыская, камунікабельная. Апошнія некалькі гадоў яна не працавала, але хацела ўладкавацца на працу. На пытанне суддзі пра спіртное пенсіянерка сказала: "Выпівала, бывала такое. Узрост такі"

Жанчына заяявіла, што абвінавачаны яшчэ ў кавярні замаўляў для яе дачкі музыку, запрашаў танцаваць. Апошні раз маці пагаварыла з дачкой за пару гадзін да трагедыі. Тая паведаміла, што з сяброўкай купілі піцу і едуць дадому на кватэру да пенсіянеркі.

Маці другой загінулай таксама станоўча ахарактарызавала сваю 26-гадовую дачку. Незадоўга да гібелі дзяўчына ўладкавалася на працу ў адной з буйных крамаў горада. Гаворачы пра шкодныя звычкі дачкі, маці сказала: "Здаралася, што выпівала. Піва вельмі любіла".

Сяброўка 27-гадовай забітай расказала, што яны раней разам працавалі на "Бабруйскмэблі". Адтуль дзяўчыну прымусілі звольніцца, бо яна любіла выпіць, а потым паводзіла сябе неадэкватна: магла абразіць, а то і стукнуць іншага. Па яе словах, дзяўчына жыла ў маці, не працавала. Жыла разам са сваім маладым чалавекам, які меў выпадковыя заробкі, а калi iх не хапала — ездзіў у Расію. Падчас яго адлучак сяброўка, маўляў, не цуралася блізкіх кантактаў з іншымі мужчынамі, у тым ліку з малазнаёмымі, пра што ахвотна распавядала.

Апошні раз яны бачыліся акурат у вечар перад забойствам. "Абяцала завязаць з выпіўкай. Мы і сустрэліся-то для таго, каб абмеркаваць яе будучае працаўладкаванне. У нас на фірме вызвалілася месца, я абяцала дапамагчы з працай. Лепш бы яна ў нас начаваць засталася", — дадала сведка.

Апытанне сведкаў працягнецца 5 снежня. Агулам сведкамі па справе праходзяць 36 чалавек.