АБФФ: клубы з Беларусі не будуць удзельнічаць у чэмпіянаце Расіі
Беларускіх клубаў не будзе ў Расіі / dinamo-minsk.by
Першы намеснік старшыні Беларускай федэрацыі футбола (АБФФ) Андрэй Васілевіч абверг чуткі пра інтэграцыю беларускіх клубаў у Расійскую прэм'ер-лігу (РПЛ).
У якасці аргументу чыноўнік спаслаўся на Саюз еўрапейскіх футбольных асацыяцый — УЕФА.
"АБФФ і РФС [Расійскі футбольны саюз] — чальцы УЕФА. Гэта значыць, нам забаронена ствараць супольныя лігі і, тым больш, удзельнічаць у іх. Мы сумленна ставімся да выканання сваіх абавязацельстваў. Магчыма, у будучыні нешта і адбудзецца. Але гэта няхутка", — сказаў Васілевіч.
Ён адзначае, што юрыдычна УЕФА супраць любога зліцця нацыянальных чэмпіянатаў. Гэта ж прапісана і ў статутных дакументах.
Міністр спорту Беларусі Сяргей Кавальчук, аднак, мяркуе, што гэтую ініцыятыву можна прапрацаваць на прыкладзе ўдзелу мінскага "Дынама" ў Кантынентальнай хакейнай лізе.
