Аддзел адукацыі: Дзеці вернікаў — у сацыяльна небяспечным становішчы

Дзеці вернікаў, а таксама са шматдзетных і студэнцкіх сем'яў адносяцца да нядбайных сем'яў. Пра гэта гаворыцца ў метадычным дапаможніку, абнародаваным на сайце аддзела адукацыі, спорту і турызму Капыльскага райвыканкама.

У Капылі студэнцкіх сем'яў няма, таму можна меркаваць, што метадычку распрацавала Міністэрства адукацыі. 

Гэтыя сем'і, як гаворыцца ў метадычцы, "характарызуюцца наяўнасцю пэўнага адхілення ад нормаў, якое не дазваляе вызначыць іх як бяспечныя". У лік такіх нядбайных сем'яў аўтары дапаможніка залічылі няпоўныя, малазабяспечаныя, замяшчальныя (у тым ліку прыёмныя) сем’і, а таксама сем’і перасяленцаў, бежанцаў, эмігрантаў, студэнтаў, сем’і, дзе ёсць дзеці-інваліды, сем’і, дзе адзін або абодва бацькі інваліды.

У дакуменце  гаворыцца, што гэтыя "фактары рызыкі" не абавязкова сведчаць пра адсутнасць камфортнага асяроддзя для дзіцяці. Аднак наяўнасць такіх фактараў з'яўляецца падставай для пастаноўкі сям'і на ўлік.