Адміністрацыя завода АКБ у Брэсце не ведае, чаму будаўніцтва прыпынілі

"Мы не маем інфармацыі, што з'явілася падставай для распараджэння аб прыпыненні будаўніцтва ТАА "АйПаўэр". Са свайго боку, атрымаўшы адмоўнае заключэнне дзяржаўнай экалагічнай экспертызы, ТАА "АйПаўэр" ініцыюе працэдуру паўторнай экалагічнай экспертызы ў адпаведнасці з заканадаўствам Рэспублікі Беларусь. Пасля гэтага мы адновім працэдуру ўводу аб'екта будаўніцтва ў эксплуатацыю", — паведамілі журналістам партала TUT.by у адміністрацыі прадпрыемства.

На заводзе кажуць, што спецыялісты працавалі над рэгуляваннем дзвюх апошніх непацверджаных крыніц шкодных выкідаў. Цяпер абсталяванне ўжо адрэгуляванае, "вынікі аналізаў, выкананыя нашай лабараторыяй, пацвярджаюць яго працаздольнасць".

Супраць будаўніцтва акумулятарнага завода брастаўчане змагаюцца ўжо амаль паўтара года. Яны ўпэўненыя, што ён істотна пагоршыць экалагічную сітуацыю ў горадзе і пагражае іх здароўю.