Айцішнікі хочуць даплачваць выкладчыкам інфарматыкі, але не маюць права
Шэлдан Купер выкладае, не задумваючыся пра грошы. Кадр з серыяла "Big Bang Theory".
Беларускія IT-кампаніі заклапочаныя падрыхтоўкай новых кадраў для сваёй галіны і гатовыя інвеставаць у школьную і ўніверсітэцкую адукацыю. Аднак заканадаўства не дазваляе ім рабіць гэта ў поўнай меры.
У прыватнасці, айцішнікі хацелі б за свой кошт павысіць зарплату выкладчыкаў матэматыкі і інфарматыкі, але не могуць гэтага зрабіць. Пра гэта ў рамках канферэнцыі # reshape2017 ў Мінску распавёў Мікалай Маркоўнік, генеральны менеджар "VP Capital Беларусь":
"Сёння IT-кампаніі не могуць падтрымаць універсітэт у частцы павышэння заработнай платы выкладчыкаў. Указ №300 пра спонсарскую дапамогу дае такую магчымасць толькі на паляпшэнне матэрыяльна-тэхнічнай базы. Гэта значыць камп'ютары набыць можна, рамонт у класе зрабіць можна. А перадаць грошы на прэмію выкладчыку нельга".
Сапраўды, указ Аляксандра Лукашэнкі №300 ад 1 ліпеня 2005 года дазваляе прадпрымальнікам аказваць фізічным асобам дапамогу толькі для "стварэння і ўмацавання матэрыяльна-тэхнічнай базы". Выключэнне можа быць зробленае толькі з асабістага дазволу кіраўніка дзяржавы.
Сёння ў Беларусі каля 85 тысяч айцішнікаў. Каля 30 тысяч з іх працуюць у Парку высокіх тэхналогій. Мікалай Маркоўнік не змог назваць гранічную ёмістасць рынку, але заўважыў, што сфера ўжо адчувае недахоп спецыялістаў.
Кампенсаваць яе можна, "перацягваючы" людзей з патрэбнымі кампетэнцыямі з суседніх краінаў ці "гадуючы" у беларускіх ВНУ. "Людзям, здольным нечаму навучыць студэнтаў, трэба плаціць у два-тры разы больш", — лічыць эксперт.
