Беларус спрабаваў схавацца ад памежнікаў у прыбіральні аўтобуса

Беларус спрабаваў схавацца ад памежнікаў у прыбіральні аўтобуса. Здарэнне адбылося 12 снежня ў пункце пропуску "Макраны" на беларуска-ўкраінскай мяжы. Як інфармуе прэс-служба Дзяржаўнага памежнага камітэта, у 32-гадовага мінчука не было дакументаў, якія ён забыўся ў Львове. "Нелегала" знайшлі беларускія памежнікі.

Высветлілася, што ў прыбіральні хаваўся кіроўца адной з турыстычных фірмаў у беларускай сталіцы. За два дні да таго ён вёз турыстаў у Карпаты, але каля Львова аўтобус трапіў у ДТЗ. Пасажыраў размеркавалі па іншых аўтобусах, а кіроўцу па сямейных абставінах трэба было тэрмінова вярнуцца ў Беларусь. Спяшаючыся, ён забыўся свой пашпарт у аварыйным аўтобусе. Пра яго мужчына згадаў толькі на пад'ездзе да мяжы і спадзяваўся нелегальна яе перасекчы.

Парушальніка за замах на незаконнае перасячэнне дзяржаўнай мяжы аштрафавалі на 20 базавых велічынь (420 рублёў).