Будынак у Гродна патрапіў у шорт-ліст міжнароднай архітэктурнай прэміі
Будынак на Вялікай Траецкай, 25 і раней атрымліваў узнагароды на міжнародных архітэктурных конкурсах / Tech Lead
Гандлёвы цэнтр на вуліцы Вялікая Траецкая ў Гродна патрапіў у шорт-ліст міжнароднай прэміі, прысвечанай дызайнерскім і архітэктурным рашэнням TraMod Awards, паведамляе hrodna.life.
У конкурсе праект прадстаўляў яго аўтар, архітэктар Віктар Варабей.
TraMod Awards арганізоўвае аднайменная акадэмія, якая вывучае ўзаемадзеянне традыцыі і сучаснасці ў архітэктуры і дызайне. Удзельнікамі конкурсу сталі архітэктары і дызайнеры з Індыі, Турцыі, Канады, Аўстраліі, Іспаніі і Англіі.
Будынак у Гродна і раней атрымліваў узнагароды на міжнародных архітэктурных конкурсах.
У чэрвені 2021 года праект атрымаў сярэбраны дыплом незалежнага архітэктурнага рэйтынгу «Залатая капітэль», дыплом ХХ рэспубліканскага конкурсу на лепшы «праект», «будаўніцтва», а таксама трапіў у шорт-ліст Міжнароднай прэміі Eurasian Prize.
У 2024 годзе будынак узнагародзілі срэбрам на Міжнароднай архітэктурнай прэміі IAD Awards 2024 Architecture & Design Community.
