Б'ёрндален зрабіў падарунак Лукашэнку ад сябе і Домрачавай

Аляксандр Лукашэнка высока ацаніў біятлонны фестываль "Гонка легендаў — зоркі біятлона за мір". Свята ўжо другі год запар праводзіцца ў рэспубліканскім цэнтры алімпійскай падрыхтоўкі па зімовых відах спорту "Раўбічы".

"Абсалютна перакананы, што ў будучым годзе ўжо будзе конкурс за тое, каб трапіць у Раўбічы на ​​аматарскі летні біятлон", — перадае БЕЛТА словы кіраўніка Беларусі. Ён дадаў, што такі фэст у Беларусі стаў магчымым у тым ліку дзякуючы асабістай ініцыятыве трохразовай алімпійскай чэмпіёнкі, Героя Беларусі Дар'і Домрачавай.

Хаця фэст арыентаваны на спартоўцаў, якія завяршылі сваю кар'еру, Лукашэнка мяркуе, што гэтае свята можа служыць добрым прыкладам і дапамагаць у матывацыі дзеючым спартоўцам. Ён адзначыў вялікую папулярнасць "Гонкі легендаў". Як доказ гэтага ён прывёў той факт, што больш за палову ад колькасці сёлетных гледачоў у Раўбічах складае моладзь.

Прысутныя паднеслі Лукашэнку некалькі памятных падарункаў. У прыватнасці, гэта быў агульны фатаздымак знакамітых спартоўцаў — удзельнікаў фэсту з іх аўтографамі. Яшчэ адзін сувенір ад сябе асабіста і сваёй жонкі Дар'і Домрачавай падарыў легендарны нарвежскі біятланіст Уле-Эйнар Б'ёрндален. Ён дадаў, што Домрачава не змагла прысутнічаць асабіста. "У яе вельмі паважная прычына", — адказаў на гэта Лукашэнка. Як вядома, Домрачава чакае нараджэння дзіцяці. Яно павінна адбыцца сёлета ў кастрычніку.

Кіраўнік Беларусі паведаміў, што самым вялікім падарункам не толькі для яго, але і для ўсяго сусветнага біятлона стане, калі будучыя дзеці Б'ёрндалена і Домрачавай пераўзыйдуць сваіх бацькоў.