Да хваробы за мяжой рыхтуйся загадзя

Не так даўно карэспандэнт Еўрапейскага радыё для Беларусі Мікалай Карняйчук вярнуўся з замежнай вандроўкі, падчас якой быў вымушаны скарыстаўся медычнай страхоўкай. Натуральна, ён вырашыў падзяліцца сваім досведам са слухачамі ЕРБ.

Нягледзячы на тое, што вытрымліваючы шматгадзінныя чэргі на марозе перад консульствам, людзі досыць сур’ёзна рызыкуюць сваім здароўем, на этапе атрымання польскай візы страхоўка не патрэбная.

А вось “шэнген” без паперчыны з “Белдзяржстраху” ці якой іншай страхавой канторы атрымаць немагчыма.

Асістанс “Белдзяржстраху”: “У залежнасці ад страхавога залога гэта будзе каштаваць… на 70.000 долараў — 9 долараў. Страхоўкі ў Польшчу мы прапануем звычайна на 30 і на 50 тысяч”.

Гаворка зараз ішла пра кошты на двухтыднёвыя страхоўкі. Нібыта клапоцячыся пра інтарэсы “каліноўцаў”, на студэнцкія страхоўкі ў краіне дзейнічае зніжка. Нягледзячы на тое, што кошты ў страхавой галіне больш-менш дэмакратычныя, большасць нашых суайчыннікаў лічыць любыя грошы, выдаткаваныя на медычную страхоўку, выкінутымі на вецер.

Насамрэч, кожны застрахаваны турыст у выпадку здарэння “страхавога выпадку” можа скарыстацца ясным алгарытмам і атрымаць медычную дапамогу за кошт “Белдзяржстраху”.

Асістанс “Белдзяржстраху”: “Калі з вамі раптам нешта здарылася — грып ці ўвогуле любы няшчасны выпадак — вы звяртаецеся да доктара. Наш прадстаўнік за мяжой — “Coris”: вы кантактуеце з ім.

Калі выдаткі вялікія і вы не можаце аплаціць іх самі — мы даем гарантыі аплаты ці грошы выдаткоўвае наш прадстаўнік. Невялікія грошы вы можаце заплаціць самі, а пасля, па вяртанні ў Беларусь, напішаце заяву, і мы вернем вам гэтыя грошы”.

У мэтазгоднасць медычнай страхоўкі не верыў і ваш пакорлівы служка Мікалай Карняйчук. Але аднойчы падчас вандроўкі па Польшчы ў яго забалела горла. Дапамога доктара была патрэбная ўжо хаця б для таго, каб выпісаць рэцэпт на антыбіётыкі — без рэцэпту ў польскіх аптэках іх не прадаюць.

Па тэлефоне, пазначаным у страхоўцы, я скантактаваўся з офісам кампаніі “Coris”, якая прадстаўляе інтарэсы “Белдзяржстраху” ў Польшчы, і — о цуд! — там пагадзіліся мне дапамагчы. Нягледзячы на тое, што доктар, які бясплатна прыйшоў да мяне па тэрміновым выкліку, аказаўся акушэрам-гінеколагам, патрэбныя лекі ён выпісаў.

А далей, як кажуць, — справа тэхнікі. Каб атрымаць грошы за лекі, набытыя за мяжой, трэба не згубіць ніводнай паперчыны.

Асістанс “Белдзяржстраху”: “Нам патрэбныя рэцэпты, квіткі, медычныя справаздачы… Калі вы тэлефануеце нам і дамаўляецеся з намі на арганізацыю медычнай дапамогі па страхоўцы, пры наяўнасці адпаведных квіткоў мы пасля аплочваем вам і гэтыя тэлефанаванні.

Але калі з вамі нешта здарылася, вы заплацілі за лячэнне больш за 500 долараў, але не звярнуліся да нас — мы вернем вам толькі 500 долараў”

Часам страхавыя выпадкі выклікаюць усмешку. У страхавой канторы “Таск” нам распавялі пра беларускага турыста, які, знаходзячыся ў Нью-Ёрку, абклаў мацюкамі карэнных жыхароў Бронкса. Тэмпераментныя афраамерыканцы скінулі небараку з гаўбца, але яму пашанцавала ўпасці ў вялікі кантэйнер для смецця — як у галівудскіх блокбастэрах.

Вядома ж, мы заўсёды спадзяемся, што “страхавы выпадак” здарыцца не з намі. Але хто ведае, дзе натрапіш на раз’юшаных тубыльцаў? Пагадзіцеся, лепш спадзявацца на страхоўку, чым на кантэйнер для смецця пад гаўбцом.

Фота — www.bn.ru