Фатограф Антон Матолька лічыць, што тэлеканал “Беларусь-1” скраў яго здымкі

Фатограф Антон Матолька пабачыў свае здымкі паўночнага ззяння ў Беларусі ў навінах на дзяржаўным тэлеканале “Беларусь-1”. У сюжэце не ўказалі аўтара здымкаў. Як распавёў Еўрарадыё сам Матолька, да яго ніхто не звяртаўся па дазвол.

Антон Матолька: “Ніякага дазволу не пыталіся. Выкарыстана не як застаўка, а як слайдшоў для навіны. Я б звярнуўся ў суд, зараз хачу пракансультавацца з юрыстам. Мы адмыслова ездзілі, каб зрабіць гэтыя здымкі, укладаліся грошы ў бензін”.

Раней здымкі Антона Матолькі таксама браў без дазволу расійскі тэлеканал.

Цяпер фатограф збіраецца паскардзіцца ў Міністэрства інфармацыі на тэлеканал “Беларусь-1”. Выкарыстанне здымкаў без дазволу і ўказання аўтарства з’яўляецца парушэннем аўтарскага права.

Фота Антона Матолькі