Групу, якая абрабавала салон мабільнай сувязі, затрымалі ў Полацку

Полацкі міжраённы аддзел Следчага камітэта расследуе крымінальную справу аб разбойным нападзе на павільён сувязі ЗТАА "Сувязны БЕЛ" у Полацку.

Паводле звестак праваахоўнікаў, 23-гадовы рабочы з Верхнядзвінска прыехаў з сябрамі да сваёй 34-гадовай сястры ў Полацк. 21 жніўня, выпіўшы, яны вырашылі атрымаць грошы ў ламбардзе. Каля 12-й гадзіны дня мужчына разам з сястрой, 31-гадовым непрацуючым віцяблянінам і 23-гадовым ахоўнікам з Віцебска прыйшлі ў павільён сувязі па вуліцы Зыгіна ў Полацку. Яны паведамілі, што хочуць узяць мабільнік у крэдыт.

Аформіўшы ўсе неабходныя дакументы, мужчына атрымаў новы мабільнік. які каштуе 449 рублёў. Потым кампанія зайшла ў ламбард, размешчаны недалёка ад салона, дзе і пакінула там новы тэлефон за 50 рублёў. За атрыманыя грошы яны купілі выпіўку і закуску. 

Праз пару гадзін кампанія вярнулася ў салон сувязі, бо ахоўнік з Віцебска вырашыў узяць у крэдыт IPhone 5S за 699 ​​рублёў. Для афармлення заяўкі мужчына перадаў адміністратару салона свой пашпарт, а пазней выйшаў з салона сувязі. Жанчына ў памяшканне не заходзіла, а чакала кампанію на вуліцы.

У гэты час два іншыя мужчыны папрасілі ў адміністратаркі паказаць ім розныя мадэлі мабільнікаў з вітрыны. Яна зразумела, што мужчыны нешта задумалі і хочуць, каб яна выйшла з-за стойкі, дзе знаходзілася трывожная кнопка.

Мужчына, які афармляў крэдыт першым, падышоў за стойку, схапіў 21-гадовую адміністратарку за шыю і штурхнуў яе да шафы. Калі дзяўчына стала клікаць на дапамогу, ён закрыў ёй рукамі нос і рот, працягваючы душыць за горла. Таксама ён пагражаў забіць яе. Мужчына запатрабаваў паказаць касу з грашыма. 

Адміністратарка змагла незаўважна націснуць на трывожную кнопку, калі да падазраванага падышоў яго знаёмы. На пытанне адміністратаркі, колькі ім трэба грошай, адзін з нападнікаў папрасіў 50 рублёў, а другі — 200 рублёў. Таксама мужчыны спрабавалі адключыць відэаназіранне ў павільёне, потым адзін з іх уцёк з месца злачынства.

Супрацоўнікі аховы і крымінальнага вышуку, якія прыбылі на месца злачынства, затрымалі трох мужчын і жанчыну.

Паводле звестак следства, 23-гадовы рабочы з Верхнядзвінска быў раней неаднаразова судзімы. Апошні раз яго асудзілі на пазбаўленне волі ў чэрвені 2016 года за крадзеж і рабаванне, быў вызвалены ўмоўна-датэрмінова ў чэрвені 2017-га. 

31-гадовы грузчык з Віцебска раней неаднаразова судзімы. Апошні раз яго асудзілі на адзін год пазбаўлення волі ў 2015-га за крадзеж. Мужчына выйшаў на волю ў лістападзе 2016 года.

Следчыя абвінавацілі затрыманых у разбоі, учыненым паўторна, групай асоб. З моманту затрымання яны знаходзяцца пад вартай. 

Пацярпелая жанчына з траўмамі шпіталізаваная ў медустанову.