Каб правезці ровар у цягніку, трэба выкупіць усё купэ?

Сваё міні-раследванне мы пачалі са звычайнага грамадскага транспарту. Паездка з “жалезным сябрам” абыдзецца вам усяго ў адзін дадатковы талон. Важна, каб вострыя часткі ровара не выступалі і, не дай Бог, каго-небудзь не зачапілі, перасцераглі Еўрарадыё ва ўпраўленні арганізацый перавозак Мінсктранса. 

Лёгка паехаць з роварам у любы беларускі горад на аўтобусе. Сталай аплаты праезду за двухколавы багаж няма. Кошт квітка залежыць ад колькасці кіламетраў і напрамку аўтобуса. 

"Складзіце яго неяк так, каб ён у дзверы ўвайшоў, бо не ў кожны аўтобус увойдзе ваш ровар. Гэта будзе, як багаж ісці, - параілі Еўрарадыё на барысаўскім аўтавакзале. - У залежнасці ад кіламетраў і куды вы паедзеце – на міжгорад ці на прыгарад. Там ужо на месцы даведаецеся кошт.”

Паляцець ровару таксама не складана. З беларускага аэрапорта можна вывозіць да 20 кілаграм багажу па адным квітку. Ровар пажадана запакаваць і здаць у багаж пры рэгістрацыі, патлумачыла супрацоўніца мінскага аэрарапорта:

“Здавайце ў багаж і перавозьце! 20 кг багажа і 8 кг ручной паклажы можна перавозіць бясплатна. Калі ён складваецца, то яго трэба скласці і ўпакаваць.”

Выезд за межы Беларусі з роварам на турыстычным аўтобусе вам будзе каштаваць на 20 еўра даражэй.  Але “на борт” вас не пусцяць, калі ваш “вел” не будзе разабраны. 

Супрацоўніца кампаніі Eurolines: “Увогуле перавозіць ровары забаронена. Можа ў іншых кампаніях можна, але ў нас, згодна з нямецкімі правіламі,  яны не прымаюцца. Толькі ў складзеным выглядзе і як падвойная аплата багажа ў 20 еўра.”

Што да беларускай чыгункі, то за праезд на электрычцы ровару, як сапраўднаму пасажыру, трэба набыць асобны квіток.  Цэлы і задаволены ён можа спакойна стаяць у тамбуры.

А вось як у электрычцы не заплаціць за ровар, распавяла Еўрарадыё Інжынер пасажырскай службы чыгункі Алена Хамічэнка: “У электрычцы ровар у неразабраным выглядзе правозіцца ў тамбуры. А ўпакаваны, ў кошце ручной паклажы, можна правезці бясплатна.”

 

Цікава, што ў цягніку ровар таксама правозіцца бясплатна, калі ён не перавышае 36 кг і 2 метраў у суме трох вымярэнняў. Прыйдзецца альбо выкупляць усё купэ, альбо набыць яшчэ адно месца ў цягніку для вашага жалезнага сябра.

Алена Хамічэнка:  “Вы можаце выкупіць асобнае купэ, ці набыць дадаткова адзін квіток. Але ў кожным выпадку прадметы, у тым ліку і ровар, не мусяць забруджваць, як вагон, так і рэчы іншых пасажыраў”.

А таксама дадала, што перавоз незапакаванага ровара немагчымы. 

Алена Хамічэнка: “Ён мусіць у кожным выпадку быць запакаваны. Таму што не вы ж не паставіце на сядзенні, якімі пазней будуць карыстацца пасажыры, брудны ровар.”

Правезці ровар праз мяжу Беларусі проста - у цягніку ці аўтобусе вы запаўняеце дэкларацыю на свой ровар і выязжаеце ў вела-вандроўку. Так жа лёгка пераехаць мяжу вярхом на ровары! Гэта магчыма - парадвалі Еўрарадыё ў памежнай службе Беларусі.

Супрацоўнік памежнай службы: “Усё магчыма! Іншае пытанне, што вам трэба будзе ў дэкларацыю ўсё занесці, бо на адваротным шляху вам скажуць, што вы там купілі, плаціце! Ну, вось гэта ўсё абавязкова, разумееце”.

Памежнік параіў перад выездам звяртацца па кансультацыі ў рэгіянальную мытню. 

Калі вы ўжо будзеце ў зоне Еўрасюза разам са сваім двухколых сябрам, то у цягніку, напрыклад, у Польшчы, вам не трэба будзе клапаціцца ні пра што, апроч свайго камфартабельнага праезду. Там, як і ў іншых еўрапейскіх краінах, існуюць адмысловыя месцы ці нават вагоны для перавозкі ровараў.

Удалай вам паездкі!

Такім чынам перавозяцца ровары ў польскіх цягніках.