Кантрабандыст беларускіх цыгарэт у Літве пратараніў аўтамабіль памежнікаў
Кантрабандыста беларускіх цыгарэт у Літве затрымлівалі як у баевіку — з пагоняй, таранам і стралянінай. Здарэнне адбылося 1 лістапада, паведамляе прэс-служба літоўскіх памежнікаў.
На мяжы з Гродзенскім раёнам Беларусі памежнікі заўважылі падазроны аўтамабіль Audi Q5. Калі яны запатрабавалі спыніцца, кіроўца націснуў на газ.
Памежнікі пачалі блакаваць дарогі ў наваколлі. Праз нейкі час за сем кіламетраў ад мяжы патруль на Toyota Land Cruiser пабачыў уцекача і паспрабаваў спыніць. Аднак той паскорыўся і пратараніў машыну памежнікаў. Пры гэтым адзін з памежнікаў атрымаў лёгкія траўмы.
Уцячы пакушальніку перашкодзіў другі памежнік: ён сем разоў стрэліў у маторны адсек "Аўдзі". Аўтамабіль спыніўся і заглух, кіроўцу паклалі на зямлю.
Высветлілася, што гэта жыхар Літвы. У яго машыне выявілі 35 скрыняў цыгарэт з беларускімі акцызнымі маркамі — агулам 17,5 тысячы пачкаў.
Кантрабандысту пагражае да васьмі гадоў зняволення. Ён знаходзіцца пад падпіскай аб нявыездзе.
