Літоўскі музей сабраў 250 экспанатаў, прысвечаных пандэміі COVID-19
Людзі прыносілі маскі, выкананыя ўручную або створаныя дызайнерамі / delfi.lt
Літоўскі нацыянальны музей сабраў 250 экспанатаў, прысвечаных пандэміі COVID-19. У 2020-2022 гадах іх ахвяравалі больш за 130 розных людзей, арганізацый і ўстаноў.
Сярод іх — білет на самалёт апошняга рэйса з Балі (эвакуацыя людзей з адпачынку), ахоўныя маскі (выкананыя ўручную або створаныя дызайнерамі), раздрукаваная 3D індывідуальная дзвярная ручка.
"Сабрана шмат віртуальнай інфармацыі — толькі яна займае 30 гігабайтаў, — кажа ў каментары madeinvilnius.lt прадстаўніца музея. — У нас ёсць дзённікі некалькіх людзей. Сотні здымкаў".
Вядома, што адзін з дзённікаў вёў лекар бальніцы. Як вядома, у Літве памерлі ад COVID-19 каля 10 тысяч чалавек.
Пандэмія COVID-19 пачалася ў канцы 2019 года ў Кітаі, а пасля ахапіла ўвесь свет. Аб яе заканчэнні аб'явілі ў траўні 2023-га.
Пакуль Літоўскі нацыянальны музей не плануе адкрываць прысвечаную гэтай тэме экспазіцыю або выставу, аднак асобныя экспанаты ўжо выкарыстоўвае на іншых выставах.
