Ліван увёў абмежаванні для авіяпасажыраў на маршруце Бейрут – Мінск
Бейрут / Ілюстратыўнае фота
Галоўнае ўпраўленне грамадзянскай авіяцыі Лівана абавязала ўсе авіякампаніі, якія выконваюць рэйсы з міжнароднага аэрапорта Бейрута, абмежаваць колькасць пасажыраў на рэйсы ў Мінск, паведаміў прэс-сакратар міністра-каардынатара спецслужбаў Польшчы Станіслаў Жарын у Twitter.
Паводле слоў Жарына, гэта зроблена ў мэтах скарачэння колькасці патэнцыйных нелегальных мігрантаў, якія накіроўваюцца праз Мінск у ЕС "па маршруце, арганізаваным беларускімі спецслужбамі".
Раней праз сітуацыю на беларуска-польскай мяжы абмежаванні на палёты ў Мінск увялі авіякампаніі Ірака, ААЭ і Турцыі.
Як паведамляла Еўрарадыё, "Белавія" заявіла, што не будзе пускаць на борт самалётаў, якія вылятаюць з Турцыі, грамадзян Ірака, Сірыі, Йемена і Афганістана. Забарону да перавозкі ў авіякампаніі тлумачаць "рашэннем кампетэнтных органаў Турцыі".
