Лукашэнка абяцае найлепшы ў свеце лёгкаатлетычны форум (відэа)
Як доказ ён згадвае чэмпіянат свету па хакеі, які прайшоў у Мінску ў траўні 2014 года.
9 студзеня Аляксандр Лукашэнка сустрэўся з прэзідэнтам Еўрапейскай лёгкаатлетычнай асацыяцыі Ханс'ёргам Вірцам. На сустрэчы ён заявіў, што Беларусь гатовая прыняць у сябе міжнародныя лёгкаатлетычныя спаборніцтвы самага высокага ўзроўню, перадае БЕЛТА.
Беларускі кіраўнік адзначыў, што ў нашай краіне могуць стварыць усе неабходныя ўмовы для правядзення міжнародных лёгкаатлетычных спаборніцтваў самага высокага ўзроўню.
Лукашэнка: "Я вельмі хацеў прасіць бы вас прывезці ў Беларусь міжнародныя спаборніцтвы (аж да чэмпіянату свету) па лёгкай атлетыцы. Мы створым для гэтага ўсе ўмовы... Можаце спадзявацца, што лёгкаатлетычны форум, які тут, магчыма, адбудзецца, будзе найлепшым у свеце".
У доказ сваіх словаў Лукашэнка згадаў чэмпіянат свету па хакеі, які прайшоў у Мінску ў траўні 2014 года. Ён адзначыў, што гэта быў найлепшы турнір ва ўсёй гісторыі хакейных чэмпіянатаў.
Прэзідэнт Еўрапейскай лёгкаатлетычнай асацыяцыі абяцаў прыняць пад увагу прапанову беларускага боку.
