Мігрант, які забіў польскага жаўнера на мяжы ўсё яшчэ ў Беларусі
Сцяна на беларуска-польскай мяжы / strazgraniczna.pl
Польскія службы ўстанавілі забойцу салдата, які ахоўваў мяжу з Беларуссю. Пра гэта паведамляе польская радыёстанцыя RMF FM са спасылкай на свае крыніцы.
Паводле звестак журналістаў, устаноўлена, што нападнік — выхадзец з Блізкага Усходу. Ён усё яшчэ знаходзіцца ў Беларусі, але можа эвакуіравацца ў Сірыю, лічаць польскія службы.
Следчыя ўстанавілі асобу забойцы, прааналізаваўшы запісы моманту нападу. Дзякуючы гэтаму ўдалося высветліць, як выглядае нападнік. Далей цягам некалькіх тыдняў паліцыянты дапытвалі мігрантаў, якія трапілі ў Польшчу. Таксама былі выкарыстаныя інфарматары з груп мігрантаў, якія цяпер знаходзяцца ў Беларусі.
Смяротнае нажавое раненне 21-гадовы польскі радавы 1-й Варшаўскай танкавай брыгады Матэвуш Сітэк атрымаў 28 мая. Ён сканаў 6 чэрвеня ў шпіталі ў польскай сталіцы.
Яшчэ на пачатку чэрвеня Польшча афіцыйна звярнулася да Мінска па дапамогу ва ўсталяванні асобы і арышце чалавека, які забіў польскага вайскоўца. Беларускі бок абяцаў разгледзець зварот, але ў выніку праігнараваў гэты запыт.
