Мінчуку не спадабаўся кошт на квіток і ён прыдумаў бомбу ў будынку вакзала
Чыгуначны вакзал у Мінску / Euroradio
Мінчуку не спадабаўся кошт на квіток і ён прыдумаў бомбу ў будынку вакзала. У выніку 58-гадовы мужчына стаў фігурантам крымінальнай справы.
Як паведамляе мінская міліцыя, здарэнне адбылося некалькі дзён таму. Мужчына патэлефанаваў на нумар чыгункі 105 і распытваў у супрацоўніцы пра кошт квітка на цягнік (куды збіраўся ехаць, не ўдакладняецца). Пачутая лічба яму не спадабалася, і мінчук стаў... пагражаць. Ён паведаміў, што рыхтуецца выбух.
Міліцыянты вылічылі зламысніка і затрымалі. Ён — беспрацоўны. За загадзя ілжывае паведамленне аб небяспецы пагражае да 7 гадоў пазбаўлення волі.
