Міністр эканомікі: Ёсць сферы, дзе заробку ў 1000 рублёў давядзецца пачакаць
Нягледзячы на планы ўладаў да канца 2017 года падняць сярэдні заробак у Беларусі да 1000 рублёў, яго ўбачаць не ўсе і не адразу. Гэты факт у эфіры тэлеканала АНТ канстатаваў міністр эканомікі Уладзімір Зіноўскі.
"Безумоўна, не ва ўсіх рэгіёнах, не ва ўсіх сектарах. Мы павінны разумець, што сярэдні заробак не менш за тысячу рублёў — гэта па краіне. Але ёсць такія галіны эканомікі, напрыклад, сельская гаспадарка або сацыяльная сфера, якія ў адзін момант не могуць дасягнуць такой заработнай платы. Хаця пры ўсіх роўных умовах, напрыклад, бізнес павінен дэманстраваць не тысячу, а паўтары тысячы, напрыклад, або тысячу трыста. І так адбываецца на самай справе. Таму заработная плата сёння памаленьку падцягваецца", — сказаў Зіноўскі.
Бізнес, тым часам, не вельмі рады такому падыходу. Рост заробкаў азначае і рост падаткаў, якія прадпрыемствы сплачваюць у бюджэт. З кожных 100 рублёў, якія атрымлівае працаўнік, 35 рублёў ідзе ў Фонд сацыяльнай абароны насельніцтва і ў Пенсійны фонд. Адпаведна, рост заробкаў выльецца ў дадатковую падатковую нагрузку на бізнес.
