На будоўлі жылога раёна "Паўночны бераг" перакуліўся кран
На месцы здарэння / @minsknews_by
На будаўнічай пляцоўцы жылога раёна "Паўночны бераг" перакуліўся кран, паведамляе агенцтва "Мінск-Навіны". Кран выкарыстоўваўся для падачы грунту ў пазухі падмурка ўнутры будынка. Паводле папярэдняй інфармацыі, страла вывернулася больш, чым звычайна, ад гэтага кран і перакуліўся.
Кіроўца крана не пацярпеў. Тэхніка, сцвярджае агенцтва, таксама істотных пашкоджанняў не атрымала.
"Паўночны бераг" — гэта вялікі жылы комплекс, які будуюць паміж Цнянскім вадасховішчам і Драздамі. Забудоўшчык абяцаў пераважна малапавярховую забудову. Аднак у пачатку красавіка з'явілася інфармацыя, што інвестар праекта — бізнэсовец з ААЭ Махамед Алабар — мае намер сысці з Беларусі і прадаць недабудаваны праект. Дольшчыкаў "Паўночнага берага" гэтая навіна расчаравала, яны выказвалі асцярогі, што праект перагледзяць, ушчыльняць, і замест абяцанага якаснага жылля яны атрымаюць кватэры ў раёне з шматпавярховікамі.
