На Магілёўшчыне шукаюць педафіла, які згвалтаваў дзвюх дзяўчынак
Міліцыя Магілёўшчыны шукае мужчыну, якога падазраюць у гвалтоўных дзеяннях супраць непаўналетніх дзяўчынак.
Першы інцыдэнт, як паведамляе ўпраўленне крымінальнага вышуку УУС Магілёўскага аблвыканкама, адбыўся 30 чэрвеня 2016 года. У лесе каля аўтадарогі вёска Сідараўка — вёска Гарадзецкая ў Краснапольскім раёне мужчына падышоў да 11-гадовай школьніцы. Пагражаючы нажом, ён згвалтаваў дзяўчынку.
Другі выпадак адбыўся больш як праз год — 17 верасня 2017 года ў лесапасадцы каля вуліцы Будаўнікоў на ўскраіне Краснаполля. Гэта не больш як 2,5 км ад месца, дзе здарылася папярэдні напад. Зноў ахвярай стала 11-гадовая дзяўчынка, якая вярталася дадому з заняткаў. Да яе ззаду падышоў мужчына, завёў яе ўглыб лесапасадкі і згвалтаваў. Дарэчы, пры сабе нападнік меў капу, якую пасцяліў на зямлю.
Праваахоўнікі не сумняюцца, што абодва злачынствы ўчыніў адзін і той самы чалавек. У абодвух выпадках мужчына меў на руках чорныя пальчаткі, а на твары — белую павязку з аранжавай і чырвонай паласой. Абедзвюм пацярпелым ён завязваў вочы. Другая дзяўчынка адзначыла, што нападнік быў таўставатага целаскладу і меў ярка выражаны жывот. Яго гаворка была "гарадской.
Прыкметы нападніка: 30-35 гадоў, рост 175-180 см, валасы кароткія светлыя, вочы шэра-блакітныя. Быў апрануты ў камуфляжны касцюм (колеру высахлай травы), куртку на замку, цёмныя красоўкі з матэрыі, кепку цёмнага колеру. Пры сабе меў нож, рэчавы мяшок цёмнага колеру, невялікую цёмную мужчынскую сумку з накладнымі кішэнямі на замках (3-4 шт.) На рамяні праз плячо.
Аператыўнікі мяркуюць, што могуць быць яшчэ ахвяры гэтага зламысніка, у тым ліку і ў іншых раёнах Магілёўскай вобласці, якія мяжуюць з Краснапольскім. У памежнай Бранскай вобласці Расіі падобных злачынстваў за апошні час зафіксавана не было.
