Надзея Астапчук аб новым судзе над Леўчанка: складана пісаць без лаянкі

"Ад эмоцый складана цяпер пісаць без лаянкі", — напісала штурхальніца ядра, прызёрка Алімпіяды-2008 Надзея Астапчук, каментуючы сітуацыю з Аленай Леўчанка. Сваю пасаду яна суправадзіла фатаграфіяй бацькоў баскетбалісткі, якія беспаспяхова чакалі дачку ля ізалятара на Акрэсціна.

Алену Леўчанка павінны былі адпусціць раніцай 15 кастрычніка пасля 15-сутачнага арышту. Аднак замест гэтага над ёй прызначылі новы суд.

"За ўсімі рашэннямі і дзеяннямі стаяць жывыя людзі. Не рэжым фабрыкуе і падпісвае пратакол, не рэжым выносіць прысуд. Дык вось, усе тыя слёзы мамы Лены вам, вырадкі, абавязкова вернуцца з лішкам", — напісала Астапчук у Facebook.

Са словамі падтрымкі Леўчанка выступіла і былая баскетбалістка зборнай Беларусі Наталля Марчанка. Яна прызналася, што таксама не можа знайсці цэнзурных слоў, каб даць ацэнку таму, што адбываецца.

"Ніколі ў жыцці я не адчувала столькі нянавісці і злосці, як сёння", — напісала Марчанка ў Instagram.

У гэтыя хвіліны ў Ленінскім судзе Мінска праходзіць суд над Леўчанка. Яе зноў абвінавачваюць ва ўдзеле ў несанкцыянаванай акцыі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.